საქართველო, ქალაქი თბილისი, ვაჟა-ფშაველას გამზირი, N45
032 2500222
ფორმულა
ტელეკომპანია "ფორმულა" საჯარო რეესტრში 2019 წლის 22 ივლისს დარეგისტრირდა. “ფორმულა კრეატივის” გუნდმა ტელეკომპანია მას შემდეგ დააარსა, რაც ტელეკომპანია "რუსთავი 2" ქიბარ ხალვაშს გადაეცა და არხის დირექტორად პაატა სალია დაინიშნა. ამ გადაწყვეტილების შემდეგ, “რუსთავი 2”-ის თანამშრომლების ნაწილმა არხი დატოვა და ზოგი "ფორმულას", ხოლო ნაწილი “მთავარ არხს” შეუერთდა.
თავდაპირველად, კომპანიის 25%-იან წილებს მიხეილ მშვილდაძე, ირაკლი საღინაძე, ზურაბ გუმბარიძე და გიორგი ლიფონავა ფლობდნენ, 2019 წლის სექტემბერში კი ტელეკომპანიის საკონტროლო პაკეტის (51%) მფლობელი თავდაცვის ყოფილი მინისტრი, დავით კეზერაშვილი გახდა.
2023 წლის აპრილში, მას შემდეგ, რაც BBC-მ ე.წ. ქოლ-ცენტრების გლობალური თაღლითური სქემის საქმიანობა დავით კეზერაშვილს დაუკავშირა, მან ტელეკომპანია “ფორმულას” საკონტროლო პაკეტზე უარი თქვა და წილის ნახევარი გადასცა ა(ა)იპ „თავისუფლების ფორმულას", რომელიც "ფორმულას" თანამშრომლებისგან შემდგარ გუნდს აერთიანებს.
2023 წლის აგვისტოში არასამეწარმეო იურიდიული პირების რეესტრში ჩნდება ინფორმაცია "ფორმულას" სამეთვალყურეო საბჭოს შექმნის შესახებ, რომლის შემადგენლობაშიც არხის თანამშრომლები (სოფიო ბრიტანჩუკი, ნინო ჟიჟილაშვილი, ირაკლი საღინაძე, მიხეილ მშვილდაძე და გიორგი ლიფონავა) ფიგურირებენ.
2025 წლის 11 მარტის ცვლილებით, დავით კეზერაშვილი წილების 26%-ის მფლობელი აღარაა, ამასთანავე 10-10% დათმეს ირაკლი საღინაძემ და გიორგი ლიფონავამაც, რის შედეგადაც, საბოლოოდ, "ფორმულას" 38.25%-ის მფლობელი მიხეილ მშვილდაძე გახდა, 32.25%-ის კი ზურაბ გუმბარიძე. ირაკლი საღინაძე და გიორგი ლიფონავა ამჟამად წილების 2.25-2.25%-ს ფლობენ, დანარჩენი 25% კი ა(ა)იპ „თავისუფლების ფორმულას" საკუთრებაში დარჩა.
დავით კეზერაშვილმა "ფორმულას" წილების 26% მიხეილ მშვილდაძეს გადასცა, რის შედეგადაც მშვილდაძე წილების 38.25%-ს ფლობს.
კეზერაშვილის წინააღმდეგ სისხლის სამართლის საქმეა აღძრული, რასაც ადგილობრივი არასამთავრობო ორგანიზაციები პოლიტიკურად მოტივირებულად აფასებენ.
ტელეკომპანიამ მაუწყებლობა 2019 წლის 1 ოქტომბრიდან დაიწყო. “ფორმულა” საერთო ტელემაუწყებლობის ავტორიზაციას ფლობს. არხი დოტაციურია და ძირითადად მფლობელის შემოწირულობების ხარჯზე ფუნქციონირებს.
ტელეკომპანია “ფორმულა” მმართველი პარტიისა და მისი საქმიანობის მიმართ კრიტიკულ სარედაქციო პოლიტიკა ატარებს. აღსანიშნავია, რომ მთავრობის კაბინეტის წევრები და "ქართული ოცნების" წარმომადგენლები არხს ბოიკოტს უცხადებენ და პირდაპირ ეთერში არ ერთვებიან.
ფინანსური პრობლემების მიზეზით, არხზე რამდენჯერმე განხორციელდა რეორგანიზაცია. 2024 წლის დეკემბერში “ფორმულამ” გასართობი სეგმენტი შეიზღუდა და თანამშრომლების ნაწილი დაითხოვა.
“ფორმულას” ჟურნალისტები პროფესიული საქმიანობის გამო თავდასხმის სამიზნე არაერთხელ გამხდარან. ამ მიმართულებით საგულისხმოა ფიზიკური თავდასხმა ტელეკომპანიის საინფორმაციო გამოშვების წამყვან ვახო სანაიაზე 2021 წელს და “ფორმულას” დამფუძნებელ, წამყვან მიხეილ მშვილდაძეზე 2023 წელს, ასევე, ჟურნალისტ და წამყვან გურამ როგავაზე 2024 წლის პრო-ევროპული აქციების გაშუქებისას. ქართული არასამთავრობო ორგანიზაციები აღნიშნულ ფაქტებს მედიის თავისუფლების ჩახშობისა და ჟურნალისტური საქმიანობისთვის ხელის შეშლის მცდელობად აფასებენ.
2025 წლის 11 მარტი - დირექტორი ზურაბ გუმბარიძე; მიხეილ მშვილდაძე - 38.25%; ირაკლი საღინაძე - 2.25%; ზურაბ გუმბარიძე - 32.25; გიორგი ლიფონავა - 2.25%; არასამეწარმეო (არაკომერციული) იურიდიული პირი თავისუფლების ფორმულა - 25%;
2023 წლის 27 ივლისი - დირექტორი - ზურაბ გუმბარიძე; მიხეილ მშვილდაძე - 12,25%; ირაკლი საღინაძე - 12,25% ; ზურაბ გუმბარიძე - 12,25%; გიორგი ლიფონავა - 12,25%; დავით კეზერაშვილი - 26%; არასამეწარმეო (არაკომერციული) იურიდიული პირი "თავისუფლების ფორმულა" - 25%;
2019 წლის 3 სექტემბერი- დავით კეზერაშვილი -51 %, მიხეილ მშვილდაძე-12.25%, ირაკლი საღინაძე-12.25%, ზურაბ გუმბარიძე-12.25% და გიორგი ლიფონავა-12.25%.
“მედიის განვითარების ფონდის” მედიის ფინანსური გამჭვირვალობის 2023 წლის ანგარიშის მიხედვით, 2023 წელსაც „ფორმულა“ იმ არხებს შორისაა, რომელთა შემოსავლის უდიდეს ნაწილი მფლობელის შემოწირულებაზეა დამოკიდებული.
2023 წელს არხის შემოსავალმა 32.6 მლნ ლარი შეადგინა, საიდანაც 83% - 27.1 მლნ ლარი არასამაუწყებლო შემოსავალია, მაუწყებლობიდან მიღებული „ფორმულას“ შემოსავალი კი 5.5 მლნ ლარს შეადგენს. კომპანიის საბიუჯეტო სარეკლამო შემოსავალი 2023 წელს 7926 ლარი იყო. საბიუჯეტო კონტრაქტები არხთან მხოლოდ საქართველოს ცენტრალურმა საარჩევნო კომისიამ გააფორმა.
მიუხედავად იმისა, რომ 2023 წელს, 2022 წელთან შედარებით, არხის საბიუჯეტო სარეკლამო შემოსავლები გაზრდილია, გასულ წლებთან შედარებით, ის მნიშვნელოვანი კლებით ხასიათდება.
წელი
საბიუჯეტო შემოსავალი
2023
7 926
2022
2 267
2021
19 073
2020
19 834
“საქართველოს ჟურნალისტური ეთიკის ქარტიის” 2024 წლის საპარლამენტო არჩევნების პერიოდში სატელევიზიო ახალი ამბების მონიტორინგის მიხედვით, “ფორმულა” ხელისუფლებისადმი კრიტიკულად განწყობილი არხია. კვლევის თანახმად, ის, კვლევის პერიოდში, „ერთიანობა-ნაციონალური მოძრაობის“ მიმართ მიკერძოებული სარედაქციო პოლიტიკით გამოირჩეოდა.
პროფილების სექციაში განთავსებული მონაცემები, რომლებიც ოფიციალურ ინფორმაციას ეყრდნობა, განახლებადია. პირველწყაროში
ხარვეზის ან უზუსტობის აღმოჩენის შემთხვევაში, დაგვიკავშირდით
(info@mdfgeorgia.ge) და ჩვენ მონაცემებს შესაბამისი
მტკიცებულებების საფუძველზე განვაახლებთ. დეტალური ინფორმაცია შესწორების პოლიტიკის შესახებ იხილეთ
აქ.
