9 ოქტომბერს, დაახლოებით 01:30 საათზე, პასტერის ქუჩაზე ინტერნეტგამოცემა "ნეტგაზეთის” ოფისთან,  რედაქციის ცნობით,  20-მდე ახალგაზრდა იყო შეკრებილი, რომლებიც ერთმანეთში პოლიტიკურ ნიადაგზე ჩხუბობდნენ. "ნეტგაზეთის” რეპორტიორი აღნიშნულ დაპირისპირებას ტელეფონით იღებდა, რა დროსაც ახალგაზრდებმა მას გადაღების შეწყვეტა მოთხოვეს. მას შემდეგ, რაც რეპორტიორს ტელეფონის კვების ბლოკი დაუჯდა, ახალგაზრდებმა ჟურნალისტს სიტყვიერი შეურაცხყოფა მიაყენეს და "ნეტგაზეთის” ოფისამდე სიტყვიერი შეურაცხყოფის თანხლებით გაჰყვნენ. რეპორტიორმა რედაქციაში შესვლა მოასწრო.  

გაზიარება:

"ნეტგაზეთის” ინფორმაციით, ადგილზე გამოცხადებულმა პოლიციამ მოკვლევა  სიტყვიერ შეურაცხყოფაზე რეაგირების მიზნით დაიწყო.

გაზიარება:

9 ოქტომბერს, MDF-მა  ,,ნეტგაზეთის" ჟურნალისტისთვის პროფესიული საქმიანობის ხელისშეშლის ფაქტებზე განცხადება გაავრცელა და  სამართალდამცავ ორგანოებს მოუწოდა სათანადო კვალიფიკაცია მისცენ მომხდარ ინციდენტს;  

გაზიარება:

8 ოქტომბერს, მარნეულის #48 საარჩევნო უბანზე დაპირისპირების დროს ტელეკომპანია "იმედის” გადამღებ ჯგუფს საქმიანობის მხრივ პრობლემები შეექმნა: ქვების დაშენის დროს ოპერატორს კამერა დაუმტვრიეს. როგორც მედიის განვითარების ფონდს "იმედის” საინფორმაციო სამსახურის ხელმძღვანელმა ნანა ლეჟავამ განუცხადა, დაზიანებული კამერის გამო არხის გადამღები ჯგუფი ტელევიზიას ადგილზე მიმდინარე მოვლენების შესახებ ინფორმაციას სოციალური ქსელის საშუალებით აწვდიდა.

გაზიარება:

შსს-მ გამოძიება სსკ-ს 162-ე პრიმა მუხლით მარნეულში მომხდარ ინციდენტთან დაკავშირებით დაიწყო.

გაზიარება:

8 ოქტომბერს, ღამით ქუთაისის სარჩევნო ოლქის 90-ე საარჩევნო უბნის ტერიტორიაზე ტელეკომპანიების - "იბერია” და ,,GDS" - ჟურნალისტებსა და ოპერატორებს უცნობმა პირებმა ფიზიკური შეურაცხყოფა მიაყენეს და ტექნიკა დაუზიანეს, ,,რუსთავი 2" -ის ჟურნალისტს კი მიკროფონი წაართვეს. ამავე დროს, როგორც მედიით გავრცელებული კადრებიდან ჩანს, მოძალადეები ჰომოფობიური სიტყვებით მიმართავდნენ ნაციონალური მოძრაობის მაჟორიტარობის კანდიდატს.

რეგიონული ონლაინ გამოცემა Kutaisi Today-ის ინფორმაციით, "აღნიშნულ დავალებას ხელმძღვანელობდა იმერეთის გუბერნატორის პირველი მოადგილე გიორგი ჭიღვარია, რომელიც ამავე დროს ქართული ოცნების შტაბის უფროსია და საკრებულოს საორგანიზაციო და ადამიანური რესურსების მართვის განყოფილების უფროსი ლევან გოგელაშვილი. მათთან ერთად ახალგაზრდების დაპირისპირებას ხელმძღვანელობდა კახაბერ აბზიანიძე, გოჩა ავალიანი, გიორგი სვანიძე და გია ჯინჭარაძე”.

გაზიარება:

შინაგან საქმეთა სამინისტრომ ფაქტზე გამოძიება სისხლის სამართლის კოდექსის 187-ე მუხლის პირველი ნაწილით (სხვისი ნივთის დაზიანება ან განადგურება, რამაც მნიშვნელოვანი ზიანი გამოიწვია) დაიწყო. 

გაზიარება:

9 ოქტომბერს, MDF-მა  , ტელეკომპანია ,,იბერიას", ,,GDS"-ისა და ,,რუსთავი-2"-ის ჟურნალისტისთვის პროფესიული საქმიანობის ხელისშეშლის ფაქტებზე განცხადება გაავრცელა და  სამართალდამცავ ორგანოებს მოუწოდა სათანადო კვალიფიკაცია მისცენ მომხდარ ინციდენტებს;  აგრეთვე გამოიძიონ მედიით გავრცელებული ინფორმაცია საჯარო მოხელეთა შესაძლო მონაწილეობის შესახებ მომხდარში.

გაზიარება:

კახეთის საინფორმაციო ცენტრის ცნობით, 23 სექტემბერს ღამით, წნორში ქუჩის სამუშაოების მიმდინარეობის დროს ადგილზე მყოფმა წნორის რწმუნებულმა, თამაზ მათეშვილმა კახეთის საინფორმაციო ცენტრის ჟურნალისტს გელა მთივლიშვილს ფიზიკური და სიტყვიერი შეურაცხყოფა მიაყენა.

ჟურნალისტის ცნობით, მათეშვილი ალკოჰოლური სასმელის ზემოქმედების ქვეშ იყო.

გაზიარება:

ინციდენტის მეორე დღეს, 24 სექტემბერს თამაზ მათეშვილმა მომხდარის გამო ბოდიში მოიხადა და თანამდებობა დატოვა.

მომხდარზე გამოძიება სისხლის სამართლის კოდექსის 154-ე მუხლის მე-2 ნაწილით დაიწყო, რაც ჟურნალისტისათვის პროფესიულ საქმიანობაში უკანონოდ ხელის შეშლას გულისხმობს. დანაშაული ისჯება ჯარიმით ან თავისუფლების აღკვეთით ვადით ორ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.

გაზიარება:

საქართველოს შინაგან საქმეთა სამინისტრომ 25 აგვისტოს „ლიბერალს“ სამტრედიაში, 2016 წლის 20 აგვისტოს „დემურ სტურუასათვის, პოლიციური ძალადობის წინააღმდეგ" აქციაზე გადაღებული კადრები მოსთხოვა. შსს-ს იმერეთის სამხარეო სამმართველო აქციაზე პოლიციის მანქანის დაზიანების გამო გამოძიებას სისხლის სამართლის კოდექსის 187-ე მუხლის პირველი ნაწილით ატარებს (ნივთის დაზიანება ან განადგურება).

„ლიბერალმა“ მასალების მიწოდებაზე სისხლის სამართლის საპროცესო კოდექსის 50-ე მუხლის საფუძველზე განაცხადა უარი. აღნიშნული მუხლის თანახმად, ჟურნალისტს არა აქვს ვალდებულება, პროფესიული საქმიანობის დროს მიღებულ ინფორმაციასთან დაკავშირებით საქმეზე მოწმე იყოს.

გაზიარება:

2016 წლის 18 აგვისტოს Media.Ge-ს მთავარ რედაქტორსა დავით მჭედლიძეს სამართალდამცავებმა პროფესიული საქმიანობის განხორციელების შესაძლებლობა არ მისცეს.

მჭედლიძე ქალაქ რუსთავში, გაგარინის ქუჩაზე მიტოვებულ შენობაში ფართის დაკავების შემთხვევას აშუქებდა. მისი ინფორმაციით, მან მიტოვებული შენობის ოთახში, სადაც შეკრებილი იყვნენ კრიმინალური და საპატრულო პოლიციის თანამშრომლები, გადაღების ნებართვა ითხოვა, სამართალდამცავებმა კი ის ოთახიდან ხელის კვირით გამოაძევეს. ოთახში შესვლის მეორე მცდელობის დროს მჭედლიძეს კამერა ჩართული ჰქონდა. 10 წამიან ვიდემასალაში სამართალდამცავი ჟურნალისტს მიმართავს არ გადაიღოს და გადამღებ მოწყობილობისკენ ხელს წევს, რის შემდეგც კადრი წყდება. 

აღნიშნული ფაქტის შესახებ მჭედლიძემ 19 აგვისტოს საქართველოს პროკურატურას მიმართა. ის ფაქტის საქართველოს სისიხლის სამართლის კოდექსის 154-ე მუხლით გამოძიებას ითხოვს, რაც ჟურნალისტური საქმიანობის ხელისშეშლას დასჯადად აცხადებს.

გაზიარება:

აღნიშნულ ფაქტთან დაკავშირებით პროკურატურამ გამოძიება სისიხლის სამართლის კოდექსის 154-ე (ჟურნალისტურ საქმიანობაში ხელისშეშლა) და 333-ე (სამსახურეობრივი უფლებამოსილების გადამეტება) მუხლებით დაიწყო.

გაზიარება:

ინციდენტის დღეს საქართველოს ჟურნალისტური ეთიკის ქარტიამ შესაბამის ორგანოებს მოუწოდა, გამოიკვლიოს მომხდარი ფაქტი და დადგეს იმ პირის პასუხისმგებლობის საკითხი, რომელმაც ჟურნალისტს არ მისცა პროფესიული საქმიანობის განხორციელების საშუალება.

გაზიარება: