საქართველო, თბილისი, ვაკის რაიონი, ილია ჭავჭავაძის გამზ., N39ა (იურიდიული მისამართი) საქართველო, თბილისი, ლუბლიანას ქუჩა N5 (ფაქტობრივი მისამართი)
ტელეკომპანია GDS 2012 წლის ივნისში შპს ვტვ-ს სახელწოდებით დაფუძნდა. არხის 100%-იანი წილის მფლობელი თავდაპირველად ტელეკომპანია “მეცხრე არხის” ტექნიკური დირექტორი ვლადიმერ შენგელია იყო. 1 თვეში არხმა სახელწოდება და მფლობელი ერთდროულად შეიცვალა. GDS-ის 100%-იანი წილის მფლობელი ყოფილი პრემიერ-მინისტრის, ბიძინა ივანიშვილის შვილი ბერა ივანიშვილი გახდა.
2017 წელს GDS სახელისუფლებო სარედაქციო პოლიტიკის სხვა ტელეარხებთან: “იმედთან” და “მაესტროსთან” ერთად ერთ "იმედის" ჰოლდინგში გაერთიანდა, რის შემდეგაც არხის სამაუწყებლო ბადე გასართობი შინაარსის გახდა. 2017 წლის 28 იანვარს GDS-ის 100%-იანი წილის მფლობელი შპს ჯორჯიან მედია პროდაქშენ გრუპი (ინა გუდავაძე, დიდი ბრიტანეთისა და ჩრდილოეთ ირლანდიის გაერთიანებული სამეფო, ტელეიმედის მფლობელი ) გახდა.
თავდაპირველად, GDS სპეციალიზებული (შემეცნებითი) მაუწყებლობის ლიცენზიას ფლობდა, თუმცა 2015 წელს ლიცენზიის მოდიფიცირების შედეგად საინფორმაციო და საზოგადოებრივ-პოლიტიკური გადაცემების წარმოების უფლება მოიპოვა. ლიცენზიის მოდიფიცირების შემდეგ, არხზე საზოგადოებრივ-პოლიტიკური გადაცემა 20/30 გავიდა, რომელსაც თავდაპირველად ბიძინა ივანიშვილი უძღვებოდა. ყოფილმა პრემიერ-მინისტრმა პროგრამის მიზნად მოსახლეობისთვის „ერთიანი ნაციონალური მოძრაობისა” და რუსთავი 2-ის პროპაგანდის განეიტრალება დაასახელა. თუმცა, მოგვიანებით არხი პოლიტიკურიდან ისევ გასართობ მაუწყებლად გარდაიქმნა და ამჟამად მაყურებელს ფილმებსა და სერიალებს სთავაზობს.
ივანიშვილის ოჯახი, კერძოდ, ბიძინა ივანიშვილის მეუღლე ეკატერინე ხვედელიძე 2012 წლიდან ტელეკომპანია “მეცხრე არხში” 80% წილს ფლობდა. არხი საპარლამენტო არჩევნებიდან 8 თვეში დაიხურა.
2020 წლის ივლისში GDS-ს დირექტორად ზაქარია გელაშვილი დაინიშნა. ის ამ პოზიციას დღემდე იკავებს. არხის შემოსავლები 2023 წელს 3,330,654 ლარს შეადგენდა. აღსანიშნავია, რომ საბიუჯეტო ორგანიზაციები GDS-თან ყოველწლიურად აფორმებენ კონტრაქტებს. 2022 წელს 22 436 ლარის ღირებულების კონტრატი გაფორმდა.
1, ივლისი 2020 - დირექტორი - ზაქარია გელაშვილი, მესაკუთრე - შპს “ჯორჯიან მედია პროდაქშენ გრუპი” 100%;
28 იანვარი, 2017 - დირექტორი - თინათინ გობეჯიშვილი, მესაკუთრე - შპს “ჯორჯიან მედია პროდაქშენ გრუპი” 100%;
23 ივლისი, 2012 - ბერა ივანიშვილი 100%;
5 ივნისი, 2012 - ვლადიმერ შენგელაია 100%.
წელი | მთლიანი შემოსავალი GNCC-ის მონაცემებით | მთლიანი შემოსავალი GNCC-ის მონაცემებით (სესხი და სხვა ტიპის არასამაუწყებლო შემოსავალი) | საბიუჯეტო შემოსავლები |
2023 | 3,330,654 | 3,330,654 | განახლდება |
2022 | 1,921,962 | 1,928,908 | 22 436 |
2021 | 2,800,330 | 2,838,798 | 13 601 |
2020 | 2,796,127 | 2,842,353 | 19 425 |
2019 | 1,839,937 | 1,904,853 | 37 644 |
ამჟამად GDS TV-ის სამაუწყებლო ბადეში ძირითადად სერიალებსა და ფილმებს ვხვდებით. არხს საინფორმაციო ან ანალიტიკური გადაცემები არ აქვს.
პროფილების სექციაში განთავსებული მონაცემები, რომლებიც ოფიციალურ ინფორმაციას ეყრდნობა, განახლებადია. პირველწყაროში ხარვეზის ან უზუსტობის აღმოჩენის შემთხვევაში, დაგვიკავშირდით (info@mdfgeorgia.ge) და ჩვენ მონაცემებს შესაბამისი მტკიცებულებების საფუძველზე განვაახლებთ. დეტალური ინფორმაცია შესწორების პოლიტიკის შესახებ იხილეთ აქ.
