http://www.tv25.ge/

info@tv25.ge

მისამართი:

თაყაიშვილის # 61, ბათუმი 6000

ტელეფონი:

+995 (0422) 27-69-25

ტელევიზია ტელეარხი 25

ტელეარხი 25 1993 წლის ივნისში ბათუმში დაფუძნდა და აჭარის რეგიონის მოსახლეობას აწვდის ინფორმაციას. ტელეკომპანია კერძო / საერთო მაუწყებლობის ლიცენზიას (B29) ფლობს და ბათუმს, ქობულეთს, ხელვაჩაურს, ოზურგეთის რაიონის ნაწილს და სარფიდან ფოთამდე ზღვისპირა ზოლს ფარავს.

არხის ამჟამინდელი მფლობელები გიორგი სურმანიძე (49 %) და მალხაზ ვერძაძე  (51 %) არიან. არხის მფლობელობა წლების განმავლობაში გარკვეულ ცვლილებებს განიცდიდა. 2000 წელს გიორგი სურმანიძის (51%) და მალხაზ ვერძაძის (24%) წილების მფლობელი მიხეილ გაგოშიძე გახდა (75%). მიხეილ ვერძაძე დამფუძნებელთა შორის 2004 წლის მაისიდან აღარ ფიგურირებს და 75%-იანი წილის მფლობელები კვლავ გიორგი სურმანიძე და მალხაზ ვერძაძე ხდებიან. არხის ვებ-გვერდზე განთავსებული ინფორმაციის თანახმად, აღნიშნული ცვლილებები ხელისუფლებას უკავშირდებოდა. “2000 წლის 19 თებერვალს უშიშროების სამსახურის თანამშრომლებმა “ტელეარხი 25”-ის ხელმძღვანელებს ძალით გააჩუქებინეს ტელეკომპანიის აქციათა საკონტროლო პაკეტი, რის შემდეგაც ტელევიზია უშუალოდ აჭარის ავტონომიური რესპუბლიკის მეთაურის, ასლან აბაშიძის მფლობელობაში გადავიდა.”

საკუთრებაში შემდგომი ცვლილებები 2012 წელს განხორციელდა. 2012 წლის თებერვალში არხს 2 ახალი მესაკუთრე - ლევან ქარდავა (50%) და ჯემალ ვერძაძე (50%) ჰყავს. ლევან ქარდავა 2012 წლის საპარლამენტო არჩევნებზე წალენჯიხის რაიონის მაჟორიტარ დეპუტატად აირჩიეს და ის ამჟამად პარლამენტში ფრაქცია “ნაციონალური მოძრაობა - მაჟორიტარების” წევრია.

2012 წლის 30 ოქტომბრიდან ტელარხ 25-ის 100%-იანი წილის მფლობელი ჯემალ ვერძაძე ხდება, ხოლო 2012 წლის ნოემბრიდან ჯემალ ვერძაძესთან ერთად 49%-იან წილს გიორგი სურმანიძე ფლობს. 2014 წლის იანვარში არხის მფლობელებმა გააკეთეს განცხადება, რომ პროკურატურის მხრიდან დაკითხვის დროს მათზე ხორციელდებოდა ზეწოლა, რათა მათ განეცხადებინათ, რომ 2012 წელს არხის გასხვისება ყოფილი ხელისუფლების მაღალი პოლიტიკური თანამდებობის პირების უშუალო ჩარევით მოხდა. სახალხო დამცველი და არასამთავრობო ორგანიზაციები აღნიშნული საკითხის გამოძიებას მოითხოვდნენ.

2025 წლის 20 იანვარს ტელევიზიამ გაავრცელა საგანგებო განცხადება , რომ 1-ელი იანვრიდან შეჩერებულია არხის როგორც საინფორმაციო გამოშვებებისა და პოლიტიკური თოქ-შოუების, ისე ვებგვერდისა და სოციალური პლატფორმების მუშაობა. განცხადებაში მუშაობის შეჩერების მიზეზი განმარტებული არ არის და აღნიშნულია, რომ არხის ფუნქციონირების დროულად აღსადგენად მუშაობა ყოველდღიურ რეჟიმში მიმდინარეობს.