22 აპრილს ტელეკომპანია “იმედის” გადაცემა “პოლიტიკის” ყოფილმა წამყვანმა შალვა რამიშვილმა პრესკონფერენცია გამართა და განაცხადა, რომ 5 აპრილს მისი სამსახურიდან გათავისუფლება არხის გენერალური დირექტორის გიორგი ბახტაძის მხრიდან მის სარედაქციო დამოუკიდებლობაში ჩარევას და მასზე განხორციელებულ ზეწოლას უკავშირდებოდა. ჟურნალისტის განცხადება შეეხებოდა 2015 წლის დეკემბერში “პოლიტიკაში” მოსამართლე ლევან მურუსიძის მონაწილეობას და გადაცემისთვის რესპონდენტების შერჩევის საკითხს.
მტკიცებულებად, რომ გენერალური დირექტორი მასზე ახორციელებდა ზეწოლას, ლევან მურუსიძის სურვილის შესაბამისად გადაცემაში იუსტიციის საბჭოს ის წევრები მიეწვია, ვინც მის მიმართ კრიტიკულად არ იქნებოდნენ განწყობილი, შალვა რამიშვილმა მასსა და გიორგი ბახტაძეს შორის Viber-ის მიმოწერა წარუდგინა, რომელიც 2015 წლის 17-18 დეკემბრით თარიღდება.
იმავე დღეს ტელეიმედის გენერალურმა დირექტორმა Viber-ის მიმოწერის ავთენტურობა დაადასტურა, თუმცა მისი შინაარსი სტუმრების შერჩევის ჩვეული სარედაქციო სამუშაოთი ახსნა, ხოლო რამიშვილთან საქმიანი ურთიერთობის შეწყვეტის მიზეზად წამყვანის არაეთიკური საქციელის დაასახელა.
აღნიშნულ ფაქტთან დაკავშირებით შალვა რამიშვილმა საქართველოს მთავარ პროკურატურას მიმართა და მასზე, როგორც ჟურნალისტზე განხორციელებული ზეწოლის ფაქტზე გამოძიების დაწყება მოითხოვა.
მთავარმა პროკურორმა ირაკლი შოთაძემ განაცხადა, რომ ჟურნალისტის მიმართვის საფუძველზე, ფაქტების სიზუსტის დადგენის მიზნით, ყველა იმ პირის დაკითხვა მოხდებოდა, ვინც რამიშვილის განცხადებაში ფიგურირებდა.
ჟურნალისტური საქმიანობისთვის ხელის შეშლა საქართველოს სისხლის სამართლის კოდექსით დასჯადი ქმედებაა. კოდექსის 154-ე მუხლის მიხედვით, ჟურნალისტისათვის პროფესიულ საქმიანობაში უკანონოდ ხელის შეშლა ისჯება ჯარიმით ან საზოგადოებისათვის სასარგებლო შრომით ვადით ან/და გამასწორებელი სამუშაოთი ვადით ორ წლამდე. იგივე ქმედება, ჩადენილი ძალადობის მუქარით ან სამსახურებრივი მდგომარეობის გამოყენებით, ისჯება ჯარიმით ან თავისუფლების აღკვეთით ვადით ორ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.
ჟურნალისტის სარედაქციო დამოუკიდებლობას იცავს სიტყვისა და გამოხატვის თავისუფლების შესახებ საქართველოს კანონიც.
ამ საკითხზე საქართველოს ჟურნალისტური ეთიკის ქარტიამ შალვა რამიშვილის მიმართვის საფუძველზე იმსჯელა, რომლის გადაწყვეტილებით, ტელეკომპანია „იმედის“ გენერალურმა დირექტორმა, გიორგი ბახტაძემ დაარღვია ქარტიის მეორე პრინციპი, რომლის მიხედვითაც “დაუშვებელია ჟურნალისტის იძულება, პროფესიული საქმიანობისას მოიქცეს ან აზრი გამოხატოს საკუთარი სინდისის წინააღმდეგ.” ამავდროულად, საბჭომ მიიჩნია, რომ ჟურნალისტმა შალვა რამიშვილმა განხილულ საქმეში დასახელებულ გადაცემის მომზადებისას დაარღვია ჟურნალისტური ეთიკა და არაკეთილსინდისიერება გამოიჩინა საზოგადოების მიმართ.
შალვა რამიშვილთან ტელეკომპანია იმედმა ხელშეკრულება 2016 წლის 5 აპრილს შეწყვიტა, რის მიზეზადაც მისი არაეთიკური ქმედება დასახელდა. იმავე დღეებში შალვა რამიშვილი ტელეკომპანიის თანამშრომელმა თათია სამხარაძემ სექსუალური ხასიათის შევიწროვებაში საჯაროდ დაადანაშაულა, რასაც ის აუდიო ჩანაწერით ადასტიურებდა, რომლის ავთენტურობა ლევან სამხარაულის სახელობის სასამართლო ექსპერტიზის ეროვნულ ბიურომ დაადგინა. ბრალდება რამიშვილმა უარყო და ფაქტზე გამოძიების დაწყების მოთხოვნით პროკურატურას მიმართა.
